العميل عشان يشترى محتاج يشوف دليل اثبات على كلامك، يعنى لو بتقوله ان المنتج ده بيعمل كذا يبقى لازم تثبتله ده.
عارف إعلانات التخسيس والشعر اللى بتيجى في التلفزيون، تلاقى دائماً بيجيبوا واحد كان وزنه زائد ويصوروا معاه على انه استخدم المنتج وقد ايه ساعده انه يخس.
ده اثبات على فاعلية المنتج، الشركة هنا عاوزه تخلى العميل يشوف بنفسه النتيجة اللى هيوصلها وده بيساعد جداً في زيادة المبيعات وتحسين الكونفرجن لانه بيخلى العميل يثق في المنتج او الخدمة بشكل كبير.
انت كمان لازم تثبت للعملاء المحتملين ان قيمة المنتج او الخدمة اللى بتقدمها حقيقة وده تقدر تعمله عن طريق حاجات كتير وبتختلف من بيزنس لبيزنس تانى.
- فيديو بيوضح طريقة استخدام المنتج والنتيجة اللى بتوصلها
- شهادات العملاء اللى اشتروا المنتج ممكن فيديو او نص بسيط
- دراسات وبحوث بتوثق كلامك وان منتجك بيوصل للنتيجة اللى العميل عاوزها
- دراسات حالة لعملاء قبل وبعد استخدام المنتج بتاعك، كانوا فين وبقوا فين
